لاہور ہائیکورٹ نے ایف آئی اے کو فرخ حبیب کو ہراساں کرنے سے روک دیا

لاہور؛لاہور ہائیکورٹ نے وفاقی تحقیقاتی ادارہ ( ایف آئی اے ) کو پاکستان تحریک انصاف کے رہنما فرخ حبیب کو غیر قانونی طور پر ہراساں کرنے سے روک دیا ۔ہائیکورٹ میں فرخ حبیب کو ہراساں کرنے کے معاملے پر سماعت ہوئی، پی ٹی آئی رہنما کی جانب سے احمد پنسوتہ ایڈووکیٹ عدالت میں پیش ہوئے۔فرخ حبیب کے وکیل نے موقف اپنایا کہ ایف آئی اے نے طلبی کا نوٹس جاری کیا، ایف آی اے کی انکواری میں شامل تفتیش ہونا چاہتے ہیں مگر ایف آئی اے غیر قانونی طور پر ہراساں کر رہا ہے۔وکیل فرخ حبیب نے عدالت سے استدعا کی کہ عدالت ایف آئی اے کو ہراساں کرنے اور غیر قانونی کارروائی سے روکے۔بعدازاں عدالت نے ایف آئی اے کو فرخ حبیب کو غیر قانونی طور پر ہراساں کرنے سے روکتے ہوئے درخواست نمٹادی۔