ہمارے معاملات میں کوئی مداخلت نہ کرے :افغان وزیر داخلہ

کابل: فغانستان کے قائم مقام وزیر داخلہ ملا سراج الدین حقانی نے کہا ہے کہ ہم اپنے تمام پڑوسیوں اور دنیا کے ساتھ اسلامی اصولوں اور اپنی قومی روایات کی روشنی میں مثبت تعلقات چاہتے ہیں ، ہم کسی کے معاملات میں مداخلت نہیں کرتے ، ہم دوسروں سے کہتے ہیں کہ وہ ہمارے معاملات میں مداخلت نہ کریں۔

کابل میں قائم مقام وزیر داخلہ کی تعارفی تقریب کا انعقاد کیا گیا۔ تعارفی اجلاس میں نامور علماء کے علاوہ امارت اسلامیہ افغانستان کی مذاکراتی ٹیم کے سربراہ شیخ الحدیث مولوی عبدالحکیم حقانی ، مذاکراتی ٹیم کے رکن شیخ شہاب الدین دلاور ، چیف آف آرمی اسٹاف قاری فصیح الدین اور افغانستان کے مشرقی زون کے سربراہ شیخ انوارالحق نے اجتماع سے خطاب کیا ۔

قائم مقام وزیر داخلہ سراج الدین حقانی نے تعارفی نشست سے خطاب کرتے ہوئے کہا کہ اللہ تعالیٰ نے ہمیں اسلامی نظام دیا ہے۔ اب ہم قول و فعل میں اللہ تعالیٰ کا شکر ادا کریں گے۔”عملی شکریہ یہ ہے کہ آپ اور میں اس نظام کو اس طرح چلائیں جس طرح اللہ نے ہمیں حکم دیا ہے۔ اپنی مرضی کو شریعت نہ کہیں ، اگر ہم شریعت کے خلاف جائیں تو یہ اس نعمت کی ناشکری ہے ، اللہ نہ کرے ، اللہ یہ نعمت ہم سے واپس لے۔

سراج الدین حقانی کا کہنا تھا کہ اسلام میں قیادت کسی کا حق نہیں بلکہ یہ ایک اللہ کی امانت ہے جو قابل لوگوں کو دی گئی ہے۔ میں اپنے آپ کو اس بھاری ذمہ داری کے قابل نہیں سمجھتا۔ لیکن ان رہنماؤں کے لیے جنہوں نے مجھے یہ خدائی امانت سونپی ہے ، اس ذمہ داری کی ادائیگی کےلیے میں اللہ سے مدد مانگتا ہوں اور میں آپ سے تعاون چاہتا ہوں ، جیسا کہ آپ نے جہاد کے مشکل دنوں میں ہماری ہر طرح سے مدد کی ہے۔

انہوں نے کہا کہ ہماری پالیسی واضح ہے۔ ہم اپنی زمین پر قبضہ ختم کرنا چاہتے تھے اور ایک اسلامی نظام قائم کرنا چاہتے تھے جو اللہ تعالیٰ نے ہمیں دیا۔ہم اپنے تمام پڑوسیوں اور دنیا کے ساتھ اسلامی اصولوں اور اپنی قومی روایات کی روشنی میں مثبت تعلقات چاہتے ہیں ، ہم کسی کے معاملات میں مداخلت نہیں کرتے ، ہم دوسروں سے کہتے ہیں کہ وہ ہمارے معاملات میں مداخلت نہ کریں۔عوام کو اطمینان ہونا چاہیے کہ ہم آپ کے بیٹے اور آپ کے بھائی ہیں ، ہم آپ کی مدد اور تعاون سے یہاں پہنچے ہیں ، ہمیں اب بھی آپ کے تعاون کی ضرورت ہے ، یہ نظام آپ کا ہے۔ ہم اسے آپ کے تعاون کے بغیر نہیں چلا سکیں گے اور آپ کی آرام دہ زندگی کی حفاظت اور ترقی کے لیے ہم ہر ممکن کوشش کریں گے۔

سراج الدین حقانی نے مزید کہا کہ مجاہدین بھائیوں کو اپنے رہنماؤں کی اطاعت کرنی چاہیے جیسا کہ انہوں نے جہاد کے دوران کیا۔جنگی مال غنیمت اور دیگر مادی چیزوں اور عہدوں سے دھوکہ نہ کھائیں۔ اپنے ماضی کے جہاد کے اچھے اعمال کو مادی چیزوں سے خراب نہ کریں۔ یہ فانی چیزیں ہیں۔ ان کے ساتھ اپنے بہترین اعمال کو خراب نہ کریں۔ہمارے لوگ مظلوم تھے۔ ان کے ساتھ برا سلوک نہ کریں۔آپ ان کے حکمران نہیں بلکہ عوام کے خادم ہیں ، لہذا کسی کو تکلیف نہ پہنچائیں ، اگر کوئی ایسا کرتا ہے تو یہ ان کی ذاتی غلطی اور ان کے ساتھ بد سلوکی ہے۔ ایسے مسائل میں عوام حکام سے اپیل کریں ، مجرموں کو شریعت کے مطابق سزا دی جائے گی۔

سراج الدین حقانی کا کہنا تھا کہ میں ہر ایک کو یاد دلانا چاہتا ہوں کہ ہم نے جو معافی دی تھی وہ سیاسی معافی نہیں بلکہ ایک شرعی قانون ہے کیونکہ اس نے ہمارے دلوں سے بدلے کی سوچ نکال دی ہے ، سابق افسران کے ساتھ بھی نامناسب الفاظ کا استعمال نہ کیا جائے۔